Silah tacirləri Rusiya-Ukrayna müharibəsindən qazanc əldə etməyə çalışırlar.
“Terefsiz.az”ın xəbərinə görə, bu fikri Türkiyə Prezidenti Rəcəb Tayyib Ərdoğan Antalyada Dokumapark Müasir İncəsənət Qalereyasında keçirilən “Qadınlarla Böyük Türkiyə Yolunda” proqramında çıxış edərkən bildirib.
Ərdoğan deyib ki, Türkiyə sülhpərvər mövqeyinə görə, hazırda dünyanın diqqət mərkəzindədir: “Dünya Rusiya-Ukrayna müharibəsinə müdaxilə edə bildimi? Xeyr. Onların hamısı silah satıcılarına kömək edir. Dünyanın silah tacirləri harada, necə və nə qazanacaqlar, buna çalışırlar. Biz isə sülhə necə nail ola bilərik, buna çalışırıq”.
“Eyni gündə biz həm cənab Putinlə (Rusiya Prezidenti Vladimir Putin – red), həm də Zelenski (Ukrayna Prezidenti Volodimir Zelenski – red) ilə telefonla danışdıq. Bu savaşı dayandırmaq, tərəflərin sülhə gəlməsi üçün, nə edə bilərik, bunu öyrənməyə çalışırıq. Bu səmimiyyətlə yolumuza davam edirik. Çünki bilirik ki, dünya yalnız sülh üzərində bərqərar olub”, – Türkiyə lideri qeyd edib.
