Asiya İnkişaf Bankı (AİB) 2024-cü ildə Azərbaycanla 2024-2028-ci illəri əhatə edəcək yeni tərəfdaşlıq strategiyasını həyata keçirməyə başlayacaq.
“Terefsiz.az” banka istinadən xəbər verir ki, AİB-nin cari əməliyyatları özəl sektorun inkişafının stimullaşdırılması, dövlət sektorunun səmərəliliyinin artırılması, infrastrukturun yaxşılaşdırılması və insan kapitalının gücləndirilməsinə yönəlmiş və 2019-2023-cü illər üçün olan tərəfdaşlıq strategiyası çərçivəsində həyata keçirilir.
“2023-cü ildən 2026-cı ilə qədər AİB energetika, nəqliyyat, dövlət sektorunun idarə edilməsi, kənd təsərrüfatı və təhsilə diqqət yetirəcək. Bank yaxşı inteqrasiya olunmuş regional nəqliyyat sistemləri vasitəsilə regional əməkdaşlığın genişləndirilməsində hökumətə dəstək verəcək. AİB-nin iştirakı ilə regional suvarma şəbəkəsinin bərpası kənd təsərrüfatı məhsuldarlığını artıracaq və ərzaq təhlükəsizliyinin qorunmasına kömək edəcək. Enerji islahatları əsas ötürmə və paylama infrastrukturunun inkişafı və bu sektorda innovativ təşəbbüslərin qəbulu ilə dəstəklənəcək.
Texniki peşə təhsilinin inkişafına investisiya qoyuluşu ölkədə insan kapitalını gücləndirəcək. Bu, həmçinin müasir peşə məktəblərinin təkmilləşdirilməsinə və qurulmasına və siyasi islahatların təşviqinə kömək edəcək”, – bank hesab edir.
AİB özəl sektoru ticarət, maliyyə, KOS-un genişləndirilməsi və infrastrukturun inkişafı ilə bağlı layihələrə cəlb edəcək. “Bank həmçinin yerli valyutada maliyyələşdirməni özəl sektora yerli valyuta istiqrazları vasitəsilə təqdim etmək üçün hökumətlə sıx əməkdaşlıq edir” – bankın informasiya bülletenində deyilir.
AİB-dən vurğulayıblar ki, Azərbaycan hökumətin 10 illik “Azərbaycan 2030: Milli Sosial-İqtisadi İnkişaf” inkişaf strategiyasına uyğun olaraq dayanıqlı və rəqabətqabiliyyətli iqtisadiyyatın inkişafına, inklüziv cəmiyyətin qurulmasına, insan kapitalının təkmilləşdirilməsinə, “yaşıl” inkişafa doğru irəliləməyə və infrastrukturun təkmilləşdirilməsinə sadiqdir.
“İndi hökumət xarici borcları azaltmaq niyyətindədir və innovasiyalar və yüksək texnologiyalar üçün xarici borclanma imkanlarını nəzərdən keçirir. AİB bu cür layihələrin seçmə kreditləşməsinə şərait yaratmaq üçün hökumətlə sıx əməkdaşlıq edir. Layihələrdə gender bərabərliyi tədbirlərinin təkmilləşdirilməsi, icraçı müəssisələrin idarəetmə və institusional potensialının gücləndirilməsi, eləcə də investisiyaların maliyyə dayanıqlığının təşviqi əsas istiqamətlərdir”, – bülletendə qeyd olunur.
Bu günə qədər AİB Azərbaycana dövlət sektoruna 67 kredit və ümumi məbləği 3,7 milyard ABŞ dolları olan texniki yardım və qrant təqdim edib. Azərbaycana kredit ödənişlərinin ümumi məbləği 3,96 milyard ABŞ dolları təşkil edir. Onlar müntəzəm və güzəştli adi kapital resursları hesabına maliyyələşdirilirdi. AİB-nin Azərbaycandakı cari suveren portfelinə 565,2 milyon ABŞ dolları məbləğində 1 kredit və 1 suveren zəmanət daxildir.
31 dekabr 2022-ci il tarixinə AİB-nin Azərbaycandakı qeyri-suveren əməliyyatları üzrə cəmi ödənilməmiş kreditlər və ödənilməmiş öhdəliklər 34,7 milyon ABŞ dolları təşkil edir ki, bu da AİB-nin ümumi özəl sektor portfelinin 0,27%-ni təşkil edir. 2004-cü ildən bəri 8 investisiya layihəsi üzrə qeyri-suveren birgə maliyyələşdirmənin ümumi məbləği 1,22 milyard ABŞ dolları təşkil edir.
