Bu ilin yanvar ayında Azərbaycanın magistral neft kəmərləri ilə 3 251,4 min ton neft nəql edilib.

TEREFSİZ.AZ saytı Statistika Komitəsinə istinadən verdiyi xəbərə görə, magistral neft kəmərləri ilə nəqletmənin həcmi ötən ilin yanvar ayından 5,4% azdır.

Ötən ay magistral neft kəmərləri ilə nəqletmənin 80,8%-i Bakı-Tbilisi-Ceyhan (BTC) neft ixrac kəməri ilə həyata keçirilib. Belə ki, cari ilin yanvar ayı ərzində bu kəmər vasitəsilə 2 628,4 min ton neft ötürülüb. Bu isə 2019-cu ilin yanvar ayından 6,6% azdır. Dövr ərzində BTC kəməri ilə 382,3 min ton (11,5% az) tranzit nefti də nəql edilib.

Qeyd edək ki, BTC boru kəməri Bakı yaxınlığındakı Səngəçal terminalından başlayır. Boru kəmərinin gündəlik ötürmə qabiliyyəti 1,2 mln. bareldir. Hazırda BTC kəməri əsasən Azərbaycandan “Azəri-Çıraq-Günəşli” (AÇG) yataqlar blokunun nefti və “Şahdəniz” kondensatı daşıyır. Bundan əlavə, BTC vasitəsilə digər xam neft və kondensat həcmləri, o cümlədən tranzit nefti nəql olunur.

Azərbaycan nefti illik ötürücülük qabiliyyəti 7 mln. ton olan Bakı-Supsa kəməri, həmçinin Bakı-Novorossiysk kəməri ilə də nəql edilir.

Terefsiz.az