Dünən ölkə Prezidenti İlham Əliyev sərəncamı ilə Ceyhun Bayramov Xarici İşlər naziri təyin olunduqdan sonra Təhsil naziri vəzifəsi boş qalıb.
KONKRET.az xəbər verir ki, artıq bu vəzifəyə namizəd təsdiq olunub, sadəcə rəsmi sərəncam gözlənilir. Etibarlı mənbənin verdiyi məlumata görə Prezident bu gün Təhsil nazirinin müavini Məhəbbət Vəliyevanı qəbul edib və nazir vəzifəsinə təsdiq edib.
Məhəbbət Vəliyeva 1968-ci ildə Bakı şəhərində anadan olub. 1990-cı ildə M.F.Axundov adına Azərbaycan Pedaqoji Rus dili və Ədəbiyyatı İnstitutunu Rus dili və ədəbiyyatı müəllimi ixtisası üzrə bitirib.
1991-2003-cü illərdə Səbail rayonu 190 nömrəli tam orta məktəbdə müəllim, 2003-2008-ci illərdə “XXI əsr” Ümumtəhsil Mərkəzində təlim-tərbiyə işləri üzrə direktor müavini, 2008-2014-cü illərdə akademik Zərifə Əliyeva adına liseyin direktoru vəzifəsində çalışıb.
2001-ci ildə “İlin ən yaxşı müəllimi” Respublika müsabiqəsinin qalibi olub.
Azərbaycan Respublikası Prezidentinin 2008-ci il 25 sentyabr tarixli Sərəncamı ilə “Azərbaycan Respublikasının əməkdar müəllimi” fəxri adına layiq görülüb.
2014-2015-ci illərdə Bakı Şəhəri üzrə Təhsil İdarəsinin müdir müavini, 2015-2018-ci illərdə BŞTİ-nin müdiri vəzifələrində çalışıb.
Azərbaycan Respublikasının Prezidenti cənab İlham Əliyevin 27 iyun 2018-ci il tarixli Sərəncamı ilə təhsil nazirinin müavini vəzifəsinə təyin edilib.
Psixologiya üzrə fəlsəfə doktorudur.
YAP Nəsimi Rayon Təşkilatı Siyasi Şurasının və İdarə Heyətinin üzvüdür.
Ailəlidir, 2 övladı var.
