Azərbaycan Prezidenti cənab İlham Əliyev fiziki şəxslərin problemli kreditlərinin həlli barədə fərman imzaladığı gündən məhkəmələrdə baxılan problemli kreditlərlə bağlı işlərin icraatı təxirə salınıb.

Terefsiz.az saytının məlumatına görə, bunu Ali Məhkəmənin sədri Ramiz Rzayev deyib.

R.Rzayev bildirib ki, fərmanın icrası ilə əlaqədar bütün lazımi tədbirlər görülüb, Maliyyə Bazarlarına Nəzarət Palatası ilə birgə işçi qrupu yaradılıb.

O vurğulayıb ki, fərmandan gələn tələblər yüksək səviyyədə yerinə yetiriləcək.

Qeyd edək ki, Prezident İlham Əliyevin Azərbaycan Respublikasında fiziki şəxslərin problemli kreditlərinin həlli ilə bağlı əlavə tədbirlər haqqında 28 fevral 2019-cu il tarixli Fərmanı devalvasiyanın təsirlərini aradan qaldırmağa və problemli kreditlərin həllinə şərait yaradıb. Ölkənin sosial həyatı üçün olduqca mühüm olan, 800 mindən artıq insanın problemli kredit narahatlığını aradan qaldıran bu addım Azərbaycan Prezidentinin yüksək humanizmini, onun daim ölkə vətəndaşının yanında olduğunu bir daha nümayiş etdirir.

Terefsiz.az

“Büdcə təşkilatlarında kommunal xidmətlərin (elektrik və istilik enerjisi, təbii qaz və su) istehlakına görə limitlərin müəyyən edilməsi və tənzimlənməsi Qaydası” təsdiq edilib.

Terefsiz.az saytının məlumatına görə, bu barədə qərarı Baş nazir Novruz Məmmədov imzalayıb.

Mərkəzi və yerli icra hakimiyyəti orqanları, habelə digər büdcə təşkilatlarının rəhbərləri 3 ay müddətində özlərinin tabeliyində olan (o cümlədən, icarəyə götürülmüş) obyektlərə, habelə icarəyə verilmiş obyektlərə və onların icarəçilərinə (subicarəçilərinə) dair siyahını hazırlamalı, kağız və (və ya) elektron daşıyıcılarda Maliyyə Nazirliyinə təqdim etməlidirlər.

Qərara əsasən kommunal xidmət göstərən müəssisələr 2 ay müddətində büdcə təşkilatları ilə birlikdə nəzərdə tutulan siyahıya uyğun olaraq, sayğac quraşdırılmayan obyektlərin siyahısını tərtib edərək, kağız və (və ya) elektron daşıyıcılarda Maliyyə Nazirliyinə təqdim etməlidirlər. Maliyyə Nazirliyi buna uyğun olaraq, kommunal xidmət göstərən müəssisələr tərəfindən sayğac quraşdırılmayan obyektlərə dair siyahı təqdim edildikdən sonra 2 ay müddətində dövlət büdcəsinin imkanları və strateji yol xəritələri üzrə nəzərdə tutulan prioritetlər nəzərə alınmaqla, büdcə təşkilatları üzrə sayğaclaşmanın başa çatdırılması ilə bağlı təkliflərini Nazirlər Kabinetinə təqdim etməlidir.

Kommunal xidmət göstərən müəssisələrə tapşırılıb ki, istehlakçılara qüvvədə olan standartlara uyğun kommunal xidmətlərin göstərilməsi məqsədi ilə zəruri tədbirlər görsünlər və kommunal xidmətlərə dair istehlakçılarla müqavilələrin bağlanılması zamanı müəyyən olunmuş limitlərin nəzərə alınması, habelə kommunal xidmətlərin həmin limitlər çərçivəsində təqdim olunması istiqamətində tabeli təşkilatlar üzərində nəzarəti təmin etsinlər.

Terefsiz.az

Bakıda ölümlə nəticələnən yanğın hadisəsi baş verib.

Terefsiz.az  Fövqəladə Hallar Nazirliyinə istinadən xəbər verir ki, Nizami rayonunda beşmərtəbəli yaşayış binasının ikinci mərtəbəsində ümumi sahəsi 60 m² olan 3 otaqlı mənzilin 1 otağının yanar konstruksiyaları 15 m² sahədə yanıb.

Yanğının kəşfiyyatı zamanı 1949-cu il təvəllüdlü İbrahimova Validə Nəsir qızının meyiti yanğınsöndürənlər tərəfindən aşkarlanıb. Evin qalan hissəsi və qonşu mənzillər yanğından mühafizə olunub. Yanğını yanğından mühafizə bölmələri tərəfindən söndürülüb.

Hadisə ilə əlaqədar müvafiq qurumlar tərəfindən təhqiqat aparılır.

Terefsiz.az

Bəzi pis asılılıq və vərdişlər irsən keçirmiş

Yuxusuzluq irsən keçə bilirmiş. Böyük Britaniya alimlərinin insan genetikası üzərində  apardıqları araşdırmalar belə deməyə əsas verir.

Araşdırmalara görə, yuxunun müddəti və keyfiyyəti genin 47 hissəciyi ilə tənzimlənir. Yuxusuzluq  amili RAX8 və MEIS1 genləri ilə əlaqədardır.ME IS1 geni həmçinin nadinc ayaq sindromuna da səbəb olur.

Həmçinin, alimlərin araşdırmaları göstərib ki, genetik nizam bir çox hallarda insanların bir çox vərdişlərinin nəsildən nəsilə ötürülməsinə səbəb olur. Buna alkoqolizm, narkotik asılılığını aid etmək olar.

Xərçəng, şəkərli diabet, piylənmə, epilepsiya kimi xəstəliklərin genlə ötürülməsi faktı isə artıq çoxdan təsdiqini tapıb.

Terefsiz.az