“Maraqlı, gərgin oyuna şahid olduq. Əsl kubok ab-havası oldu”.
“TEREFSIZ.AZ” saytının məlumatına görə, bunu “Zirə”nin baş məşqçisi Rəşad Sadıqov Azərbaycan kubokunun yarımfinal mərhələsində “Neftçi” ilə keçirilən cavab oyunu barədə danışarkən deyib.
İlk oyunda olduğu kimi, cavab matçında da rəqibi ilə qolsuz bərabərə qalan “Zirə” penaltilər seriyasında 4:2 hesabı ilə qalib gələrək, finalda “Qarabağ”-a rəqib olub.
Qarşılaşmadan sonra gənc mütəxəssis fikrini bu sözlərlə davam etdirib: “Hər iki komanda taktiki mübarizə apardı. Qol epizodları çox olmadı. “Zirə” azarkeşlərini, rəhbərliyini təbrik edirəm. İlk dəfə finalda çıxış edəcəyik. İlk matçdakı ssenarinin davamına hazırlaşırdıq. 50-55-ci dəqiqədən sonra üstünlük “Neftçi”yə keçdi, topa nəzarəti itirmişdik. 5-3-2-dən 5-4-1 sisteminə keçdik. Ondan sonra komanda sanki nəfəs aldı, daha rahat oynamağa başladı. Oyunda gah bu, gah digər komanda üstün olurdu. Hər iki komanda qələbəyə layiq idi”.
O, matçdan əvvəl penaltilər seriyasına hazırlaşmadıqlarını əlavə edib: “Heç hazırlıq görməmişdim. Məşqdə bir an fikirləşdim. Amma istəmədim futbolçularıma mesaj verim ki, biz 0:0 hesabına oynayacağıq. Komandanı qələbəyə kökləyirdik. Amma kimlərin penaltini necə vurduğu haqda məlumatımız var idi. Penalti elədir ki, dünya ulduzları da bəzən qaçırırlar. Buna görə də hazırlaşmamışdıq”.
TEREFSIZ.AZ
