Bu gün erməni təxribatlarına cavab olaraq Azərbaycan Ordusunun Qarabağda və ətraf rayonlarda antiterror və sülhə məcburetmə əməliyyatlarına başlamasından 1 ay keçir.

TEREFSİZ.AZ saytı xəbər verir ki, Ali Baş Komandan İlham Əliyevin qətiyyətli siyasi iradəsi və Azərbaycan Ordusunun uğurlu əməliyyatları nəticəsində 4 şəhər (Cəbrayıl, Füzuli, Zəngilan, Qubadlı), 150-dən artıq kənd, onlarla strateji yüksəklik işğaldan azad edilib.

Bu müddət ərzində minlərlə canlı qüvvəsi və zirehli texnikası məhv edilən düşmənə dəfələrlə sarsıdıcı zərbələr vurulub və təcavüzkar Ermənistan silahlı qüvvələri geri çəkilməyə məcbur edilib.

Ermənistan tərəfinin uğursuzluqdan isterikaya düşərək, Azərbaycanın döyüş bölgəsində yerləşməyən rayon və şəhərlərində dinc əhalini, qadınları və uşaqları raket və artilleriya zərbələri ilə atəşə tutmasına rəğmən, Azərbaycan Ordusu düşmənin yalnız hərbi obyektlərini hədəfə alıb, hətta mülki əhalinin ziyan görməməsi üçün onları bu cür obyektlərdən uzaq durmağa çağırıb.

Döyüşlərin ilk günündən Azərbaycan xalqı yekdilliklə əməliyyatları dəstəkləyib, onminlərlə vətən övladı könüllü şəkildə döyüşlərdə iştirak etmək üçün müraciət edib.

Bu gün hamı “hər şey vətən üçün, hər şey cəbhə üçün, hər şey qələbə üçün” şüarı ilə ordumuzun qələbəyə nail olması üçün əlindən gələni edir.

Dilindən, dinindən, siyasi və sosial mənsubiyyətindən asılı olmayaraq, hər kəs ölkə rəhbərliyini səmimi şəkildə dəstəkləyir və eyni amal uğrunda bir yumruq kimi birləşərək Prezident İlham Əliyevin növbəti dəfə xalqa müraciət edərək yeni qələbə xəbərləri verməsini gözləyir.

report.az