Rusiyanın Ermənistandakı səfiri Sergey Kopırkinin “Ermənistan – Qarabağ strateji birliyi” forumunun təşkilat komitəsinin nümayəndələri ilə görüşünün siyasi məqsədi yoxdur”.

Bunu Rusiya Xarici İşlər Nazirliyinin rəsmisi Mariya Zaxarova ənənəvi brifinqində bildirib:

“Ölkədəki ən qədim siyasi partiyalardan biri olan “Daşnaksütyun” liderləri ilə görüş olub. Bu görüşün və söhbətin erməni tərəfinin təşəbbüsü ilə başlandığını mən də təsdiq edə bilərəm”.

Terefsiz.az saytı xəbər verir ki, XİN rəsmisi qeyd edib ki, görüşdə geniş spektorlu məsələlərə toxunulub:

“Dağlıq Qarabağ münaqişəsi mövzusu da müzakirə olunub. Baxmayaraq ki, bu məsələ əsas müzakirə mövzusu deyildi. Məsələ heç də mətbuatda yazılan kimi deyil. Sizi əmin edirəm ki, partiya rəhbərliyi ilə birgə “Ermənistan – Qarabağ strateji birliyi” forumunun nümayəndələrinin də görüşə gələcəyindən diplomatlarımızın xəbəri olmayıb”.

O, həmçinin Rusiyanın Dağlıq Qarabağ münaqişəsi ilə bağlı mövqeyində heç bir dəyişikliyin olmadığını vurğulayıb:

“Bizim mövqeyimiz həmişə balanslaşdırılmış və ölçülü olub”.

Zaxarova sonda Rusiya tərəfinin bu məsələ ilə bağlı Azərbaycanlı həmkarlarına dəqiq məlumat verdiyini qeyd edib.

Terefsiz.az